ATUR PASRAH
SARAT SARONO
Nuwun, nuwun,
nuwun, kula nuwun.
Assalamualaikum wr. wb.
Puja puji syukur
konjuk ing sahandap pepadaning Gusti ingkang Maha Agung ingkang sampun kepareng
paring pangayoman dhateng lampah kula wiwit saking nggriya ngantos ing dalem
ngriki kanthi kawilujengan.
Sih rahmating
Gusti ingkang maha wikan mugi tansah tumedhak, saha tumanduk ing sariranipun bapa
…………….. (tiyang sepuhipun CPI) sakulawarga wiwit titiwanci kalenggahan punika
ngantos dumugi ing jaman patimbalan.
Kula kumawani ngadeg
marak sowan wonten ngarso penjenengan inggih awit mundhi dhawuh saking kadang
anom kulo ………….. (tiyang sepuhipun CPA), wondene ingkang dados wigatosing
sedya
Sepisan
Adimas ................ (tiyang sepuhipun CPA) ngaturaken sungkem
pangabekti katur ing ngarsanipun para sesepuh pini sepuh ing ngriki, saha
ngaturaken salam taklim mugi katur dhateng bapa ................. (tiyang
sepuhipun CPI), mboten kesupen ugi paring pandonga dhateng putra wayah kinasih.
Kaping kalihipun
Kula kadhawuhan hangaturaken syarat sarono minangka paningset anggenipun
pepacangan antawispun .......................... kalian
................................ Wondene wujudipun :
a. Gedhang ayu
Gegadhanganipun
rama ibu mugi calon penganten tansah rahayu selami – laminipun
b. Suruh temu rosipun
Mugi calon penganten tansah cumbuh satemah saged guyub rukun
saeka praya ing sedya saeka kapti ing pakarti.
c. Jadah wajik jenang lan lapis
Mugi calon penganten saged kelet lengket nyawiji tumraping
budi, cipta, rasa miwah karsa satemah mangun brayat ingkang ayen lan tentrem.
d. Ageman sapengadeg
Minangka pralambng bilih calon penganten kakung sampun sumadya wewadosing
garwanipun.
e. Rerenggan mas - masan
Pamrihipun kajawi hamimbuhi sulistyaning warni calon penganten
putri, inggih mahanani sulistyaning asma garwanipun.
f. Woh - wohan
Pangajabing rama ibu mugi calon penganten enggal kaparingan
momongan ingkang migunani tumrap diri pribadi, kulawarga, bebrayan, nusa,
bangsa lan agaminipun.
g. Kalpika ( cincin )
Ingkang wujudipun bunder seser tur gilig mujudaken pralambang
golong giliging prasetayaning calon penganten kakung putri anggenipun badhe
amemangun bale wisma.
h. Arta (buwuh)
Minangka imbuh anggenipun badhe ewuh.
Sedaya kalawau menawi kabiji kerta ajinipun pancen mboten sepinteno namung
mratelaaken bilih adhimas ................... (tiyang sepuhipun CPA) estu –
estu anggenipun badhe amemangun bebesanan kalian bapa ..................... (
tiyang sepuhipun CPI)
Menggah ingkang kaping tiga
Hambok bilih sowan kula miwah miwah para kadang sampun damel bot repoting
kulawarga ngriki mboten sanes nyuwun lumunturing pangaksami.
Ing wasana minangka talanging atur hambok bilih wonten cicir cewetipun
anggen kula matur saha wonten bab – bab ingkang damel kirang sukarena kula
nyuwun pangapunten.
Nuwun, nuwun, nuwun, matur nuwun
Wassalamualaikum wr. wb.
Tidak ada komentar:
Posting Komentar